Naggueqatitsinni puulukit nappaataat tuniluuppoq

Nunavummi inuit nappaalasut, H1N1-imik, siornatigut puulukit nualluutaannik taaneqartartumik, tunillatsissimasut, sapaatip akunneri marluk matuma siorna paasineqarneraniit tunillatsittut 53-inut amerlipput.
juunip 11-at 2009 07:58

Sapaatip akunnera manna aallartimmat inuit 25-t tunillatsissimasut paasineqarput. Ippassarli ullup ingerlanerinnaani inuit 28-t tunillatsissimasut paasineqarput. Taamalilluni inuit 53-it tunillatsissimapput, taamaalillutik Nunavummi tunillatsissimasut Canadap sinneranut sanilliullugit amerlanerujussuupput.

Nunavummi peqqinnissaqarfimmi pisortat qullersaat, Dr. Isaac Sobol isumakuluttoqartariaqannginnerarlugu ullumi tusagassiuutinut nalunaaraluartoq, nunarsuatsinni peqqinnissaq pillugu kattuffimi, WHO-mi pisortaq, Keiji Fukuda oqarpoq, nappaatip nakkutigisassaanngitsumik tuniluutilernissaa annilaanngatigalugu.

Nunavummi Inuit nualluuteqalersutut misigisimasut tamarmik maanna misissorneqarput.

Naggueqatigiit Inuit peqqinanngitsunik nerisaqarnerat pitsaanngitsunillu inissiaqarnerat nualluutip tunillaatipallanneranut peqqutaassangatinneqarpoq.

Manna tikillugu nualluummik tunillatsissimasut amerlanerit, Qeqertaaluup kitaani Kivalliq-mi Kitikmeot-nilu najugaqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq