Naggueqatigut nuutsitaasimasut eqqaassuserneqarput
Tamannalu Labradorimi Hebronimi eqqaaniummik ippassaq uleersinikkut pisortatigoortumik nalunaarutigineqarpoq. CBC nittartakkamini taama allaaserisaqarpoq.
Hebronimi innuttaasut pisariaqanngitsumik artorsinneqarsimanerat Canadami oqartussaasut eqqaaniummi nassuerutigaat, nuutsitaasullu artorsartinneqarnertik kingusinnerusukkut atugarliuutigaat.
Nunaqarfimmi Nutaami, Hebronimut ungasinngitsumi, innuttaasut aamma taamani nuutsinneqarput. Taakku kingusinnerusumi eqqaaniummik uleersivigineqarumaartut Canadami oqartussaasut nalunaarput.
Labradorimi ministeriuneq, Danny Williams, eqqaassutissamik uleersinermini ajuusaarnerarpoq:
- Utoqqatsernerput paasilluarneqarpoq. Ukiut 50-it matuma siorna qanoq pisoqarsimanera eqqaaniummi erseqqissarneqarpoq. Taamalu pisoqaqqinngisaannassaaq, CBC-mut oqarpoq.
