Naggueqatigiit Inuit tunillanneqarnissaat ernumanartoqarpoq

Puulukit nappaataat tuniluuttoq Nunavimmiunut pitsaavallaanngilaq. Quebecimi nunalinnut allanut naleqqiullugu Nunavimmi naggueqatigiit Inuit tunillanneqarnissaat ernummanartortaqarneruvoq. Nappaatip meeqqani inuusuttunilu nappaataanerusarnera navianaratarsinnaavoq Nunavimmimi nunaqarfinni amerlaqisuni innutaasut affaat 18-it inorlugit ukioqarmata. Puulukit nappaataat pualuttut anersaartornerminnillu ajornartorsiuteqartut atukkajuppaat Nunavimmiullu amerlaqisut taama nappaateqarput. Inilunneq aamma ajornartorsiutaaqimmat nappaatip tuniluutilersinnaanera ilimanaateqaqaaq.

Nunaqarfiit arlallit peqqissaaveqanngillat nappaallu tuniluutilissagaluarpat taamaammat ajornartorsiortitsilertussaavoq. Nunavimmi nunallu immikkoortuini pingasuni indianereqarfiusuni nappaat tuniluutilissagaluarpat Quebec-imi naalakkersuisut pilersaarummik atugassaminnik maanna piareersaallutik ulapputileruttorput.

Nappaat - aamma H1N1-imik taaneqartartoq - Nunatsinni suli siumorneqanngitsoq peqqissutsimut nakkutilliisoq oqarpoq.

Tunillatsissimasunilli naammattoorsinissamut piffissaq kisimi apeqqutaasoq, nuna tamakkerlugu nakorsaanerugallartup Anne Hempel-Jørgensenip oqaatigaa.

- Taamaattumik nakorsaqarfiit tamaasa tallimanngormat nalunaarfigaavut, inuit nunani H1N1-imik tunillaaffiusimasumi feeriarsimasut, nuallulersimanerannik nalunaarfigineqarunik, nuna tamakkerlugu nakorsaanermut nalunaaruteqaqqullugit, Anne Hempel-Jørgensen oqarpoq.

Nappaat ernummatissaannginnerarpaa nalinginnaasumik nuallunnermit sakkukinnerusarmat perulunnannginnerullunilu.

Tuniluussinnaaneratali killilersimaarnissaanut siunnersuuteqarpoq: Tassa assaat errukulaneqassapput, tangajorniaraanni atisap talitaanut tangajortoqassaaq napparsimagaannilu angerlarsimaannarnissaq kajumissaarutaalluni.