Naggueqatigiit Inuit qaffasissunik atorfeqanngillat

Maannalu nutaarsiassamut pitsaavallaanngitsumut.
Allattoq Rune Langhoff
juulip 30-at 2010 14:05

Canadami Nordvestterritoriami naggueqatigiit Inuit qaffasinnerusuni atorfillit 2003-p kingornagut ikileriarsimapput, naak naggueqatigiinnit Inunneersut atorfinni qaffasinnerusuni atorfininnissamut salliutinneqarnissaat, naalakkersuisut inatsisiliornermikkut qulakkeerniarsimagaluaraat. CBC Newsimi taama aallaaserinnittoqarpoq.

Atorfiimmi qaffasinnerusut 16 procentiinnaat tamaani nunaqavissunit atorfigineqarput.

Kisitsisip taassuma ukiuni tulliuttuni pingasuni 20 procentinngornissaa, oqartussanit massakkut anguniarneqalerpoq.

Matumani naggueqatigiit Inuit arnartaat pitsaannginnerpaamik inissisimapput, taakkumi pisortatut atorfinni takussaanngingajammata.

Nordvestterritoriami nunap inoqqaavisa arnartaasa kattuffianni siulittaasup Terry Villeneuvep oqaatigaa, tamatumunnga patsisaasut piitsuussuseq, ilinniagaqarsimannginneq ilaqutariinnilu pisussaaffiit.

Nordvestterritoriami innuttasut affaasa missaat, naggueqatigiinnit Inunneersuunngikkunik nunap inoqqaavineersuusarput.