Naggueqatigiit Inuit peqqissusaat sammineqalerpoq
Tamanna Nunavummi TV-kkut APTN North-imi internetikkut toqqaannartumik aallakaatinneqartassaaq, Nunatsinniillu aamma malinnaavigineqarsinnaassalluni.
Aallakaatitat siulliit pingasut, aqagu, marlunngorpat pingasunngorpallu nalunaaqutaq ualikkut arfinermiit unnukkut nalunaaqutaq arfineq-pingasut tungaannut aallakaatinneqassapput, tassa uagut nalunaaqutarput malillugu, taakkunani sammineqassapput angutit peqqissusaat, inuusuttut qanoq inneri taavalu arnat naartusut ernilersullu qanoq inneri.
Nunani Alaskamiit Kalaallit Nunaat tikillugu, naggueqatigiit Inuit najugaqarfiini, peqqissuseq aallakaatitani oqaluttuariniarneqassaaq.
Arnat naartusut atugarisaasa aallakaatinneqarnerani peqataasussanut ilaavoq Helene Lennert, Sisimiuneersoq, taassuma oqaluttuarissavaa kalaallimik ernisussiortoqarneq ikiorteqarnerlu arnamut naartusumut ilaqutaanullu qanoq pingaaruteqartiginersoq.
Issittumi inuusuttut atugaat pillugit aallakaatitami Iqalunni suliniut, Inuit Youth Media Project, oqaluttuarineqassaaq, suliniummi sammineqarpoq, eqqumiitsuliorneq, videoliorneq, nipilersorneq assiliinerlu atorlugit inuusuttut inuunertik oqaluttuariniaraangamikku imminnut oqaluttuarisinaanngornissaat.
Suli aalajangerneqanngilaq aallakaatitat taakku Kalaallit Nunatsinni TV-kkut kingusinnerusukkut aallakaatinneqassanersut, soqutigigaannili internetikkut malinnaavigineqarsinnaapput - aqagumiit pingasunngorneq ilanngullugu, ualikkut nalunaaqutaq arfinermiit unnukkut nalunaaqutaq arfineq-pingasut tungaannut, iserfissarlu tassaavoq www.niyc.ca
