Naggueqatigiit Inuit najugaqarfii attaveqaqatigiinnerusariaqarput
Inuit Issittormiut Siunnersuisoqatigiiffianni siulittaasoq, Aqqaluk Lynge taama oqarpoq.Inuit Issittormiut Siunnersuisoqatigiiffiat, ICC, ukiunik 30-nnguinerminut atatillugu ataatsimeersuassaaq, Ruslandimi, Alaskami, Canadami Kalaallit Nunaannilu naggueqatigiit Inuit peqataaffigisaannik. Tusagassiortorpassuit Nuummut tikissapput ICC-p suliniuterpassui takusarlugillu tusaajartorlugit.Tassa tusagassiutini sammineqangaatsiartussaavoq, ulluinnarnili killeqangaatsiassalluni. Silap pissusaata allanngoriartornera, puisinniarnermik inerteqquteqarneq, uuliamik qillerinerit kulturiluunniit pineqaraluarpata paasisitsiniaaneq pisariaqarpoq. Naggueqatigiit Inuit najugaqarfiini susoqarnera ilisimasariaqarparput, tamanna pingaaruteqaleraluttuinnarpoq, immitsinnullu attaveqaqatigiittarnissarput suli pingaaruteqarneruvoq, Aqqaluk Lynge oqarpoq.
Tusagassiuutitigut attaveqaqatigiittarnerup pitsanngorsarneqarnissaa pillugu suleqatigiinnissaq angallannerlu ICC-ip ukiunik 30-inngortorsiuorluni nalliuttorsiornerminut atatillugu ataatsimeersuarnerani sammineqartussanut ilaavoq.
