Naggueqatigiit Inuit naalungiarsuutaat toqujaarnerusarput

Montrealip Universitetianersoq, Doctor Luo, misissuinermi aqutsisuusimavoq, 1990-ip 2000-illu akornanni naalungiarsuit 4 millioninit amerlanerit misissuivigineqarsimallutik.

Canadap avannamut kippasissortaani najugallit naggueqatigiit Inuvialuit akornanni naalungiarsuit toqusartut ikinnerpaapput, Nunavimmi amerlanerpaallutik.

Misissuinermit nalunaarusiami Doctor Luo oqarpoq, naalungiarsuit taama amerlatigisut toqusarnerat immaqa pinngitsoorneqarsinnaagaluartoq, anaananngortussarpassuimmigooq naartunermi nalaani pujortartarlutillu imigassartortarput.

Naalungiarsuit siniffimminni nassuiarneqarsinnaanngitsumik toqusartut Canadap kujasissuani arfineq-marloriaammik aamma amerlanerupput, siniffigisartagaani avatangiisat pissutaallutik.

Canadap issittortaani innuttaasut, inuttut aningaasarsiornikkullu atugassarititaasut, ingaammik inissiat ajornerat peqqinnartunillu inuussutissanik nerisassanik amigaateqarneq pissutaasoq, Doktor Lou allappoq.

Montrealimi McGillip universitetiani misissuinerup takutippaa, meeqqat Nunavummiittut 70 procentii naammattunik nerineq ajortut ullorlu naallugu kaattartut. Arnat inuusuttut naartutillutik peqqinnanngitsunik nerisaqartarput, imigassanik aalakoornartunik imertarlutik, sodavanditortarlutik, pujortartarlutillu. Ilaatigut tamakku pissutaallutik Canadami naggueqatigiinni inunni naalungiarsuit Canadap sinneranut naleqqiullugit pingasoriaammik amerlanerusut toqusarput.

Misissuinerp inernera Canadami nakorsat kattuffiata atuagassiaani sapaatip akunnerani uani saqqummiunneqarpoq.