Naggueqatigiit Inuit kissaataat piviusunngussaaq
Tikerarsuaq nunaqarfinnut minnernut ilaaginnarani nunaqarfinni pissutsinut takussutissaalluarpoq, tassanimi najugaqartut 350-iusut 99 procentii tassaapput naggueqatigiinnit Inunneersut. Nunaqarfimmiulli Canadamiut allat assigalugit hockey nuannarisarilluinnarpaat, namminnerlu hockey-tarfiliaminni unammisarlutik.
Naggueqatigiit Inuit inuusuttaat illoqarfimmiunik nunap kujataaneersunik, tassa Greenstone-imiunik, nunap ilaani Ontario-miittunik ukiarmi allaqateqartalerput. Allaqatigiittarnerminni annerujartuinnartumik hockey allaqatigiissutigisalerpaat. Ilinniartitsisuallu nutaaq Andy Macfarlane isumassarsivoq, inuusuttut allaffigeqatigisartakkatik tikeraartariaqaraat hockey-millu unammiartortariaqaraat. Kisiannili Tikerarsuarmit kujammut angalaneq akisoorujussuuvoq.
Decembari aallartilaartoq isumassarseriaramik internetikkut ikiortissarsiorlutik saaffiginnipput, oqaluttuarlu sukkasuumik siaruaatipallalluni. Sapaatillu akunneri arlaqanngitsut qaangiummata, 125.000 koruunit katersoreerpaat, taakkulu timmisartumut bilitsissaannut naammapput. Tamatuma saniatigut Greenstone-imi pisiniarfiutillit sukuutsinik nutaanik, hockeytartullu atisaannik tunissuteqarniarlutik neriorsuipput, illoqarfimmilu utoqqaat illuanni inuusuttut nasassaannik qungasequtissaannillu nuersaasoqassalluni.
Naggueqatigiit Inuit inuusuttaat arfineq marluk taakku timmisartumut bilitsissaminnik juullilivissoq inniminniipput. Tassalu taamaalillutik marsimi Greenstone-imukassapput allaffigeqatigisartakkatillu hockeymik unammisaqattaassallugit.
