Naggueqatigiit Inuit inuunikinnerusarput

Canadami naggueqatigiit Inuit Canadamiunut allanut naleqqiullugit ukiunik qulinik inuunikinnerusarput. Aviisi Alaska Dispatch nittartakkamini taama allaaserisaqarpoq.
Allattoq Mads Lynge
decembarip 30-at 2013 09:42

Kisitsisit Canadami naatsorsueqqissaartarfiup 1989-imit 2008-p tungaanut katersorneqarsimasai matumani tunngaviupput. Naak Canadami naggueqatigiit Inuit piffissami pineqartumi inuuneqqortunerulersimagaluartut, Canadamiunut allanut naleqqiullugu sivikkinnerusumik suli inuusarput.

Naggueqatigiit Inuit angutitaat 1989-imi agguaqatigiissillugu 63,5-inik ukioqarlutik toqusarput, 2008-milu 67,7 ukioqarlutik toqusarlutik. Naggueqatigiit Inuit arnartaat 1989-imi 71,1-inik ukioqarlutik toqusarput, 2008-milu 72,8-nik ukioqarlutik toqusarlutik.

Kisitsisilli taakku Canadami innuttaasut sinnerinut sanilliukkaanni takuneqarsinnaavoq Canadami naggueqatigiit Inuit sivikinnerusumik inuusartut.

Canadami angutit agguaqatigiissillugu 1989-imi 74,5-inik ukioqarlutik toqusarput, 2008-milu 77,5-inik ukioqarlutik toqusarlutik. Arnat agguaqatigiissillugu 1989-imi 79,7-inik ukioqalersarput, 2008-mi 81,3-nik ukioqalersarlutik.

Nunavummi toqutsisarnerit Canadap sinneranut naleqqillugu quleriaammik amerlanerusut kisitsisit aamma takutippaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq