Naggueqatigiit Inuit Indianerillu taasisinnaatitaalernerminniit ukiunik 50-inngortorsiorput

Canadami naggueqatigiit Inuit Indianerillu ukiut 50-it matuma siorna taasisinnaatitaalersimanertik Ottawami uani sapaatip akunnerani nalliuttorsiorpaat.

Canadap avannarpasissuani tunngassuteqartunut ministeri, Chuck Strahl, nalliuttorsiualaarnermi ilaatigut oqarpoq, nalliuttorsiornertik inuunerminnut pingaaruteqarluinnartoq. - Canadami taasisinnaatitaalernitsinniit ukiut 50-inngornerat nalliussivarput, inatsit nutaaq taamani akuersissutigineqarpoq, tassa naggueqatigiit Inuit Indianerillu taamani taasisinnaalermata...maannalu naalakkersuisuvut allat, aamma konservativiusut, nunap inuiisa pisinnaatitaaffiinik suli amerlanernik maanna ujartuipput, Chuck Strahl oqarpoq.

Ministeri aamma oqarpoq, naggueqatigiit Inuit Indianerillu pisinnaatitaaffiisa illersorneqarnissaannut Canada iliuuseqarsimaqisoq, angutit arnallu naligiissitanerulernissaat, aamma piginnittuusinnaanerat, suli annerusumik sulissutigissagitsik aamma oqarluni. - Nunap inuiisa canadamiutut allatulli kiffaanngissuseqarlutillu pisinnaatitaaffeqarsinnaanissaat anguniarparput, ministeri Chuck Strahl nalliuttorsiornermi oqalugiarami ilaatigut oqarpoq.