Naggueqatigiit Inuit imminnut nittarsaannissaminnut periarfissaqalerput
Piareersarnerit aallarteriivipput, nagguteqatigiit Inuit piareersarnerni akuulluavillutik, tassami Vancouverimi qaammatit qulit qaangiuppata OL-ertoqassaaq.
Naggueqatigiit Inuit peqatigiiffiat, Inuit Tapiriit Kanadami, ataatsimiititaliorsimavoq, taassumalu Canadami aaqqissuussisut qanimut suleqatigai. Canadami naggueqatigiit Inuit najugaqarfii sisamat ataatsimiititaliap suleqatigai, tamarmik peqataatitaqarnissaat qulakkeerniarlugu, pingaaruteqarmammi kulturiisa ileqqutoqaasalu takutinneqarnissaat. Pingaartumik OL-ip ammaanersiorneqarnerani naggataarneranilu kulturiisa ileqqutoqaasalu takutinnissaat pilersaarutaavoq. Naatsorsuutigineqarpoq nunarsuatsinni innuttaasut 1 milliardit missaanniittut OL TV-kkut isiginnaassagaat. Naggueqatigiit Inuit kulturiat aatsaat taama amerlatigisunit isiginnaarneqassaaq.
Naggueqatigiit Inuit illuaraannik illoqarfimmi Vancouverimi sanasoqassaaq. Tassani meterinik 20-nik portutigisunik TV-qassaaq, taakkunanilu isiginnaarneqarsinnaassapput nunani issittuni filmiliat aamma filmit naggueqatigiinnut Inunnut tunngasut. Tamakku saniatigut naggueqatigiit Inuit ulloqartinneqartassapput, kulturimut tunngassuteqartorpassuit takutinneqartassallutik. Nunavummi, Nunavimmi, Nunatsiavummi Issittumilu Killermi naggueqatigiit Inuit kulturii OL-eqarnera tamaat ullut tamaasa takutinneqartassapput.
Inuit Tapiriit Kanadami præsidentiat, Mary Simon, tusagassiorfinnut oqarpoq, naggueqatigiit Inuit kulturiannik takutitsineq inunnit aatsaat taama amerlatigisunit toqqaannartumik malinnaaffigineqassasoq. Inuit millionit arlallit Vancouverimi TV-kkulluunniit ullut tamaasa malinnanasassapput. Taamaammat naggueqatigiinnut Inunnut tamanna unamminartuuvoq kikkuunertik takutissagamikku, sooq naggueqatigiinnut taakkununnga ilaanertik tulluusimaarutiginerlugu, suna angusimaneritsik takutissallugu, siunissamilu suna anguniarnerlugu, Mary Simon oqarpoq.
