Naggueqatigiit Inuit ilisarnaataat Canadami uumasunik illersuiniaqatigiit atornerluppaat

Canadami ukiuunerani aappaagu olympiadertoqalerpat Inussuk taanna ilisarnaatitut atorneqartussaavoq, uumasunilli illersuiniaqatigiiffiup, PETA-p, inussuk taanna namminneq isumartik malillugu ilisarnaatimittut tamanut saqqummiuppaat, puisinnguaq sikumiittoq anaattamik avaaleraluttuaraa. Avaartarlugit puisinniartarneq Canadap ilaani suli atorneqartarpoq, naggueqatigiinnilli Inunnit atorneqarneq ajorpoq. Taamaammat avaartaat inussullu imminnut atatinneqarmata naggueqatigiit Inuit nuannarinngilluinnarpaat. - Kanngusuttariaqarput, kalaaleq eqqartuussissuserisoq, Aaju Peter, Iqalunni najugaqartoq, naggueqatigiillu Inuit kulturiannik illersuisuusoq pilimasoq, oqarpoq. - Ilisarnaatitta taama kanngunartigisumik atorneqarnera ajuallannarpoq. Takuinnarsinnaavarpulli uumasunik illersuiniaqatigiiffik PETA kulturitsinnik qanoq ilisimasaqanngitsigalunilu ataqqinninngitsigisoq, Aaju Peter aviisimut Nunatsiaq Newsimut oqarpoq. Ilisarnaat Canadami puisinniartarnermut atatillugu PETA-p paasititsiniaanermini atorpaa.