Naggueqatigiit Inuit filmiliaat eqqumiitsulianik saqqummersitsinersuarmi takusassiarineqassaaq
Eqqumiitsulianik saqqummersitsineq La Biennale di Venezia ukiut allortarlugit pisussatut aaqqissuunneqartarpoq, filmit qitinnerillu aamma takutinneqartarlutik.
Canada saqqummersitsinermut 1958-imili peqataasarsimavoq, naggueqatigiillu eqqumiitsuliaat filmiliaallu ilaat siullerpaamik ukioq manna ilaatinneqarlutik.
Filmi "One Day in the Life of Noah Piugattuk", akunnernik marlunnik sivisutigisoq, Venedigimi takutinneqassaaq. Filmiliortartoq ilisimaneqarluartoq Zacharias Kunuk Norman Cohnilu, filmiliortartunit IsumaTV-meersut, filmiliortuupput.
Filmiliaq 1961-imi pisunit piviusunit aallaaveqarpoq. Noah Piugattuup kipparsimaffimmiit nunaqarfimmut Igloolimmut nuunnissaa atorfilittap qaamasumik amillip Piugattummut kaammattuutigaa.
Filmi tuluttut Inuktitullu oqaasertaqarpoq, angutillu marluk taakku akornanni paatsoortoqartarneranut tunngalluni.
Canadamiut Venedigimi takutitsinersuarmi immikkoortuat Igloolimmit assinik ulikkaarpoq, Qeqertaalummiillu eqqaaniillu assinginik aamma peqarluni.
Naggueqatigiit Inuit 1960-ikkunniilli inuunerat, pissutsillu allanngoriartupiloornerat Zacharias Kunuup filmiliami oqaluttuariniartarpai.
Cannes Film Festivalimi 2001-imi taanna nersornaaserneqarpoq, filmiliaa Atanarjuat - The Fast Runner - nersorneqaatigalugu. Naggueqatigiit Inuit filmiliami tassani inuttarineqarput, Inuktitullu oqaasertalersugaalluni.
"One Day in the Life of Noah Piugattuk" tusagassiortunut sapaatip-akunnerata massuma ingerlanerani takutinneqarpoq, filmiliarlu nersorneqarluarluni.
