Naggueqatigiit inuit eqqillillu OL-eqarnissaani mininneqanngillat
Vancouver, 2010-mi februaarip qaammataani olympiaderfiussaaq, sioqqullugulu ilisarnaatissaa suliarineqareerpoq tassaalluni inussuk.
Pissartanngorniunnissanut atatillugu nalliuttorsiualaarnerit aallartereerput.
Vancouverimi qaammammi matumani nunap inoqqaavisa illuat Canadami inuit eqqillillu eqqumiitsuliaminnik sanalukkaminnillu tuniniaavissaat ammarneqassaaq.
Illu taanna arlalinnik pisiniarfeqassaaq, qularnanngilarlu OL 2010-ip ilisarnaataa inussuk tammajuitsuliatut tunisaalluarumaartoq, inussuliammi hundretusind-ilikkuutaat sanaartorneqalereerput.
Aappaagu taamaalippat OL-eqarnerani inuit eqqillillu eqqumiitsuliortut sanaluttartullu illumi pineqartumi suliaqarujoortut takuneqarsinnaajumaarput, ilaatigut ukkusissamik qiperuisut, qaanniortut allallu.
Eqqillit orpiup timitarsua atorlugu qanoq umiarialiortarnerlutik aamma takutissavaat, soorluttaaq Haisa-nik taasartakkanik qillaalasulersukkanik tippilioriaasertik takutissagaat.
OL-eqarnissaq sioqqullugu nalliuttorsiulaarnerit aallartillugit nunap inoqqaavi sapaatip-akunnerini kingullerni marlunni appisimaartinneqarput. Naggueqatigiinnit Inunneersut 25-it Nunavut-mit, Nunavik-mit, Inuvialuit-nnit aamma Nunatsiavut-mit aggersut eqqillillu arlallit peqataapput. Nalliuttorsiualaarnermi nuannarineqaqisumi ”Talking Stick Festival”-imik taasami nipilersornerit erinarsornerillu nuannarineqaqisut takutinneqarput.
Nalliuttorsiualaarnissarpassuit allartinnerinnarpaat, OL-imi aallartitinnagu pisussarpassuaqarpoq, Marianne Stenbæk, Montreal-imi ilanngutassiortorput taama tusagassaqartitsivoq.
