Naggueqatigiit Inuit Canadami aningaasamik nutaamik saqqummersitsisoqarneratigut nersorniarneqartut
Aningaasaq nutaaq Canadami aningaasani katersugaatigineqarsinnaasunut nutaani saqqummersinneqaqqammersunut ilaavoq, assillu Issittumeersut aqqutigalugit naggueqatigiit Inuit kulturiat nersorniarneqarluni.
Aningaasarli pineqartoq 10 dollari kuultimik Nunavummeersumit pilersinneqarpoq.
Canadami aningaasanik saqqummersitsisartoq Royal Canadian Mint tusagassiutinut taama nalunaaruteqarpoq.
AAMMA ATUARUK Nunavummi politikeri: Inissiat pitsanngorsarneqartariaqarput
Inuk qullermik orsutortumik ikitsisoq aningaasami assitaliunneqarsimavoq.
Inussullu aningaasap saqqaani muminganilu aamma assitaliunneqarsimalluni.
Arnap eqqumiitsuliortup Ulaayu Pilurtuutip, Nunavimmeersup, aningaasaq ilusilersorpaa.
Nagggueqatigiit Inuit kulturiata kinguaariit tulliinut ingerlateqqinneqarnissaa aanaatut pingaartikkini, eqqumiitsuliortup imminut ilisaritinnermini ilaatigut oqaatigaa.
Aningaasaq saqqummersinneqartoq 10 dollarinik naleqarpoq, tassa 48 koruunit missaat.