Naggueqatigiit Inuit atatsimiititaliuunniarpaat
Isumalioqatigiissittap naggueqatigiinnik Inunnik sammisaqartup, naggueqatigiit Inuit meerartaat 5.000-it angerlarsimaffiinit peersillugit atuarfinnut najugaqarfiutigisunut nuutsinneqarnerat misissuiffigissavaa.
Piffissami 1950-ip 1980-illu akornanni Akilinermi naggueqatitta Inuit meerartaat 5.000-it missaanniittut angerlarsimaffiiniit peersillugit atuarfinnut nerisaqarfiutigisunut atuariartortinneqartarput, amerlasuutigullu atornerlunneqartarlutik. Indianerit meerartaat tuusintillit aamma taama pineqartarsimapput.
Tamakku peqqutigalugit ilumoortussaq saammaateqatigiinnissarlu anguniarlugit isumalioqatigissitamik siorna pilersitsisoqarpoq, taakku Canadami angalassapput inuillu pineqartut misigisarsimasaannik tusarniaavigissallugit, taamaaliornikkullu Canadamiut akunnerminni imminnut saammaateqatigiinnissaat nutaamillu paaseqatigiinnissaat anguniarneqassaaq.
Isumalioqatigiissitap sulinini aallartippaa, taamaattorli aallaqqaataaniilli ajornartorsiuteqartoqarmat, sulinini unitsiinnartariaqarsimallugu. Isumalioqatigiissitap ajornartorsiuterpassuinut ilaavoq, naggueqatigiit Inuit ilaasortaatitaqannginnerat, taakkulu misigisimapput misigipilunnikuusatik indianerit pineqarnerattulli sukumiitigisumik sammineqanngitsut.
Taamaattumik naggueqatigiit Inuit kattuffiat, Inuit Tapiriit Kanatami, juunimi ukiumoortumik ataatsimiinnermi aalajangerpoq, isumalioqatigiissitap ataani naggueqatigiit Inuit pillugit immikkut pilersitsisoqartariaqartoq.
Isumalioqatigiissitamik taama ittumik pilersitsisoqassasoq maanna aalajangiunneqarpoq. Isumalioqatigiissitamut siulittaasortaap eqqartuussisup Murray Sinclair-ip oqaatigaa, isumalioqatigiissitaq issittumi Inuit ilaatinnagit iliuuseqarsinnaanngitsoq, erseqqissarlugulu naggueqatigiit Inuit immikkut kultureqarlutillu oqaaseqartut kiisalu oqaatigalugu naggueqatigiit Inuit atuarfinni nerisaqarfiutigisuni atornerlunneqartarsimasut. Taamaattumik naggueqatigiit Inuit immikkut isumalioqatigiissitaliuunnissaat pisariaqarpoq, atuartuusimasut atuariartortitaanerminni misigisarsimasaat naalliuutigisarsimasaallu pillugit misissuisussamik.
