Naggueqatigiit Inuit aningaaserivissuannik pilersitsinissaq Kuupik V. Kleistip siunnersuutigaa

Nunani issittuni inuit tamarmik aningaasaqarnerat pitsaanerulissappat inuuniarnikkullu atugarisaat assigiikannernerulissappat, siunissami qaninnermi nutaamik aaqqiisoqartariaqarpoq. Naggueqatigiit Inuit aningaaserivissuat Kuupik V. Kleist naapertorlugu aaqqiissutaasinnaavoq.
juulip 29-at 2014 12:13

Issittumi Nunat aningaasarsiornikkut ingerlatseriaasii assingiinngitsupilussuupput, soorlu Alaskami naggueqatigiit inuit, ukiumut ataasiarlutik aningaasarpassuarnik, aatsitassarsiornikkut uuliasiornikkullu iluanaarutinit, juullilernerani agguagarsisarput. Issittumili Nunat allat allaanerusumik naggueqatigiinnut inunnut allatut atugassaqartitsillutik.

Issittumi Nunat taamatullu inuit naggueqatigiit, assigiimmik aningaasatigut atugassaqartinneqarnissaat, ICC-p Inuvimmi aqqaneq aappassaanik ataatsimeersuarnerani eqqartorneqarpoq, ilaatigut Nunatsinni Naalakkersuisut siulittaasorisimasaat, Kuupik V. Kleist saqqummiussilluni oqalugiarluni.

Aqutseriaatsit assigiinngitsut akimmiffiusarput

Nunat Issittumi ataasiakkaat aqutseriaasii taamatullu nunat allamiut aatsitassarsiorfiinut piumasaqaataatasa assigiinngiiaarnerisa, Nunat Issittormiut suleqatigiinniarnerinut annertuumik akimmiffiusartoq, Kuupik V. Kleistip oqalugiareernermini KNR-imut oqaatigaa.

- Isumaqarpunga suliassarujussuusoq paasiniassallugu, Inuit nunagisaanni aaqqissuussinerit qanoq ittuunersut. Ilisimatusarfigalugit, nalunaarsorlugit taava aamma naapeqatigiinnikkut oqalliseqatigiinnikkullu periutsit suut inuiaqatigiinnut iluaqutaanerpaanersut paasiniarneqartariaqarpoq, Kuupik V. Kleist oqarpoq.

AAMMA ATUARUK ICC peqqussutinik 46-nik suliakkiivoq

Aningaasarsiornikkut siuarsaanerit piviusunngortinneqassappata, Inuit naggueqatigiit nunani ataasiakkaani atugarisaat misissoqqaarneqartariaqartut, Kuupik V. Kleistip oqaatigaa.

- Soorlu uanga inassuteqaatigaara assigiissaarinerusumik Issittut Nunanni periuseqaraanni taava suleqatigiissinnaaneq periarfissarissaarnerulissaaq.

Suleqatigiissinnaanerli periarfissinneqassappat, naggueqatigiit inuuniarnikkut atugarisaat siullermik misissuiffigineqartariaqartut, Kuppik V. Kleistip oqaatigaattaaq.

- Ilisimavarput Issittut Nunaanni inuuniarnikkut annertuumik ajornartorsiuteqartugut. Piitsuussuseq atuuppoq taamatullu ineqarniarnermut tunngasut Issittumi assigiiaartorujussuarmik ajornartorsiutigineqarlutik. Tamakku qaangerniassagaanni taava aningaasarsiorfitsigut periarfissat atorluarniartariaqarlutik, Kuupik V. Kleist oqarpoq.

AAMMA ATUARUK ICC-mut ataatsimeersuariat nersorniarneqartut

Periarfissat suut aqqutigalugit aaqqiisoqarsinnaaneranik, ICC-p Inuvimmi ataatsimeersuartuisa oqallinnerminni, ilaasa siunnersuutigaat, Nunat Issittut ataatsimoorussaminnik aningaaserivissuarmik pilersitsinerisigut ajornartorsiutit arlaqartut qaangerneqarsinnaasut isumaqarfigaat.

- Inuit Nunaat ataatsimut isigalugu, inuit namminneq aqutaannik aningaasalersuinermik periarfissiisoqassappat periarfissaasutut isigaara, naggueqatigiit Inuit aningaaserivissuannik pilersitsisoqarsinnaanera. Taannalu aqqutigalugu aningaasaliiffissatut pingaarnersiukkat aningaasaliiffigineqarsinnaassallutik.

ICC-p Inuvimmi ataatsimeersuarnerni oqalugiariartortitaq, Kuupik V. Kleist taama oqarpoq.

Inuvimmi ataatsimeersuaqataasunit piumasarineqartut annertuut ilagaat, Nunat Issittormiut aningaasaqarnerat pillugu immikkut ataatsimeersuartitsisoqartariaqartoq.