Naggueqatigiit Inuit aningaasaqarniarnerat pitsaanerulersinniarneqarpoq
Naggueqatigiit Inuit Canadamiittut ajornartorsiutiginerpaasaat tassaapput aningaasarsiornikkut inunnillu isumaginninnikkut ajornartorsiutit.
Canadap issittortaata kippasissuani najugallit Inuvialuit, kiisalu Nunavummiut, Nunavimmiut Nunatsiavummiullu ajornartorsiuterpassuaqarput.
Suliffeqarfiit akileraarutitigut oqilisaavigineqarnissaat, Charlie Wattip kissaatigaa, Canadap issittortaani suliffinnik pilersitsisoqarnissaa aamma siunertaalluni.
Canadap issittortaa isorartoorujussuuvoq, assartuinermullu akit qaffasittorujussuullutik, taamaattumik suliffeqarfinnik pilersitsiniartut ikittuinnaapput, innuttaasullumi aningaasartuuteqangaatsiartarlutik.
Tamaani innuttaasut aningaasartuutaat ataatsimut isigalugit qaffasittorujussuupput, innuttaasut Canadap kujasinnerusortaaniittut aningaasartuutikinnerusarlutik.
Siunnersuut Canadap inatsisartuini akuerineqassappat, akit ullumikkut atuuttut appartinneqarsinnaanissaat neriuutigineqarpoq, innuttaasut aningaasartuutikinnerulernissaannik kinguneqartussamik.
Naggueqatigiit Inuit suliniaqatigiiffianni Inuit Tapiriit Kanatami siulittaasoq Mary Simon, naggueqatigiit Inuit ulluinnarni atugaannik senatimi saqqummiusseqqammerpoq, akileraarutit aaqqissuusseqqiffigineqarnissaat matumani neriuutaalluni.
