Naggueqatigiit imminnut pisuuteqattaalerput

Kenyami naggueqatigiit assigiinngitsut kikkuussuseq tunngavigalugu toqoraanermik imminnut pisuuteqattaalerput, politiken.dk allappoq. Præsidentip Mwai Kibakip naggueqataanik, Kikuyunik aaqqissuussamik saassussinernut akisussaanerarlugu illuatungiliuttut siulittaasuat Raila Odinga pisuutippaat.

Tamanna pivoq ippassaq kikuyut meeqqat, arnat angutillu untritilikkaat oqaluffimmut qimarngummata oqaluffiullu ikuallatsinneqarneratigut kikuyut 50-it missaat ajunaarlutik.

Isigisaq ataasiinnaavoq, tassalu kikkuussuseq tunngavigalugu kikuyunik nungusaaneq, Raila Odingamit siulersorneqartoq, Kenyami naalakkersuisut siulittaasuata oqaaseqartartua, Alfred Mantua, BBC-mut oqarpoq.

Odingap malittaasa Luo-kuussut killormut pillutik Kibaki kikkuussuseq tunngavigalugu nungusaasutut aamma pisuutippaat.

Kikuyut inuussutissarsiornikkut naalakkersuinikkullu Kenyami ingerlatsisuusimapput, naggueqatigiillu allat neriussimagaluarput præsidentimut qinersinermi tamanna allanngortissinnaallugu.

Maannakkut præsidentiusoq Mwai Kibaki 76-inik ukiulik sapaatiummat qinersinermi ulluni pingasuni kisitsereernermi ajugaasutut suaarutigineqarpoq.

Tamassuma kingorna Raila Odingap EU-miillu qinersinermut alaatsinaatsunit kisitsinermi peqquserluttoqarsimaneranik nalunaarutiginnittoqarpoq. Illua’tungiliuttut kikuyukkut pasivaat qinersinermi peqquserluttuliorsimasutut.

Paatsiveerusimaarneq sakkortusineqarpoq Kenyami nutaarsiassaqartitsiviit, qinersinermi aqutsisut siulittaasuat Samuel Kivuti issuarmassuk, Kibaki ilumut ajugaanersoq ilisimanagu oqartoq.

Oqarneraaneq ilumoornersoq uppernarsineqarsinnaasimanngilaq, kisiannili Samuel Kivutip Kibaki ajugaasutut sapaatiummat suaarutigaa.

Ilimagineqarpoq inuit 250 -300-t akornaniittut perulluliornermi toqutaasimassasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat