Naggueqaterput erinarsortartoq tusaamasaq Charlie Panigoniak toquvoq

Charlie Panigoniak, Hudsonip kangerliumanersuata kimmut sineriaani Illuligaarsummeersuuvoq, naggueqatigiinnilu inunni Inuktitut erinarsuutinik nutaalianik atuisaleqqaartuulluni. Tamanna tusaamaneqassutigilerlugulu nuannarineqalissutigisaanut ilaavoq.
 
Erinarsortartoq Elvis Presleytut koorporpalaartunik erinarsortarpoq taallaatalu oqaasertaat naggueqatigiit inuit ulluinnaannut, asanninnermut aliasunnermullu tunngapput.
 
Charlie Panigoniak allalinnik ilulleqartoq guitareqartorlu Canadap issortortaani tamani ilisimaneqarluarpoq.
 
Isumagissaarluartarninilu ilisimaneqaatigalugu.
 
- Aliasunneranik nuannaannginneranillu takusaqarninnik eqqaamasaqanngilanga, erinarsortartup toquneranut atatillugu erinarsortartoqataa Susan Aglukark CBC-imut oqarpoq.

Charlie Panigoniak CBC Northern radio aqqutigalugu nipilersuusiaminik immiussivoq nipilersugaallu Nunatsinni KNR aqqutigalugu aamma ilisimaneqalerlutik, nipilersuusiaami Canadami naggueqatigiinnit inunnit nipilersukkanit nunatsinni ilisimaneqalersut siulliit ilagaat.
 
Erinarsortartoq ICC-ip Nunavummi 1983-imi ataatsimeersuaqqaarnerani appisimaartuuvoq, Charlie Panigoniak Nunavummi qiimasumik nutaamillu nipilersoriaaseqalernermut takussutissiisuuvoq.