Nagdlúnguak tupaallatsitsisinnaavoq

BankNordik GM aallartippat qallunaat arfinillit kalaallillu marluk dommeriussapput. Dommerit peqatigiiffiat Siggarta aamma Assammik arsartartut kattuffiat ataasinngornermi GM aallartittussaq sioqqullugu isumaqatigiissusiunngitsoorput.

- Danmarkimiit dommerit arfinillit aamma kalaallit dommerit tikereerput, GHF-mi siulittaasup tullia John Jakobsen KNR-mut oqarpoq.

Unammersuarnerit aallartissapput nalunaaqutaq 14.00 angutini Nagdlúnguak Ilulissaniik aamma SAK Sisimiuniik siulliullutik unammissallutik.

- Nagdlúnguup angutitai ukiormanna arsartugissaarput. Tupaallatsitsillutik pissartanngorataannaapput, John Jakobsen oqarpoq.

GSS Nuummeersoq siorna pissartanngorpoq, SAK-lu siorna sølvinnattoq ukiormanna arlalinnik nutaartaqarpoq. NÛK Nuummeersoq aamma arsartugissaarpoq.

- Angutit unammersuarnerat ukiormanna assut pissanganarniarunarpoq, John Jakobsen oqarpoq.

Arnani GSS Nuummeersoq pissartanngussangatinneqarpoq.

Aajuku ataasinngornermi unamminissat:
Nal. 14.00 Nagdlúnguak - SAK angutit
Nal. 15.45 Nagdlúnguak - I-69 arnat ( KNR 1-mi toqqaannartumik aallakaatissaaq)
Nal. 17.30 NÛK - Norsaq HC angutit (KNR 2-mi toqqaannartumik aallakaatissaaq)
Nal. 19.15 SAK - NÛK arnat (KNR 2-mi toqqaannartumik aallakaatissaaq)
Nal. 21.00 GSS - K-33 angutit