Nagdlúnguak GM-mik aaqqissuisuussaaq

Arsaattartut kattuffiata GBUp aappaagu silami angutit, arnat inuusuttullu GM-rfissaat inissippai.

Nagdlúnguak Ilulissaneersoq aappaagu angutit inersimasut GM-rnerannik aaqqissuisuussaaq. Tamanna GBU-mi siulersuisut marlunngornermi unnukkut aalajangiuppaat.

Nagdlúnguak assammik arsarnermi inersimasut pissartanngorniunnissaannik aamma aaqqissuisuusussaq taamaasilluni annertuunik marlunnik aaqqissuinissamini ulapaartussanngorpoq.

- GBU-mi unammersuarnermut ataatsimiititaliap kingusinnerusukkut aalajangissavaa iligiit qassit GM-mut anngutissanersut aammalu qaqugorpiaq GM-rtoqassanersoq, GBUp siulittaasua Lars Lundblad KNR-imut taama oqarpoq.

Qangali ileqquuvoq unammersuarnernik aaqqissuisut toqqaannartumik GM-imut annguttarnerat. Taamaakkaluartoq Qeqertarsuup tunuani anngunniunnerit pisarneq malillugu pikkunassagunarpunaasiit. Tassami iligiit arlallit naligiittorujussuupput. Ukiormanna G-44 Qeqertarsuarmeersoq pissartanngorpoq T-41 Aasianneersoq bronzennattoq. Angutit GM-qarneranni Nagdlúnguak ukiorpassuarni annguttuartartoq ukiormanna anngutinngilaq.

Arnat inersimasut Nuummi pissartanngorniutissapput NÛK aaqqissuisoralugu angutillu inuusuttut U-18 Aasianni T-41 aaqqissuisoralugu pissartanngorniutissapput.

Aappaagu illup iluani pissartanngorniuffissat ulluni qaninnerni inissinneqassapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl