"Naatsorsuutit Aputsiaq"-mik taasat suliarineqartalissapput
Naalakkersuisooqatigiinni aalassatsitsisoqarnerata kingorna inatsisartut ataatsimiinnerat nalunaaqutaq sisamat qaangilaara aallarteqqippoq.
Ataatsimiinneq aallarteqqimmat Demokraatineersoq Palle Christiansen Siumullu gruppia siunnersuuteqarput suliffeqarfiit ingerlatseqatigiiffiillu Namminersornerullutik Oqartussanit pigineqartut ingerlanneqartulluunniit, pinngortitaq mianeralugu qanoq iliuuseqarsimanerminnik ukiumoortumik ”naatsorsuusiortassasut”, tamannalu Naalakkersuisut peqquneqarnissaannik Inatsisartut aalajangiiffigisassaannik anguniaqquneqarpoq. Siunnersuut partiinit tamanit ilalernartinneqarpoq.
Naatsorsuusiortarnerit ”Naatsorsuutit Aputsiaq”-mik Siumukkunnit taaguuteqartinniarneqarput, naatsorsuusiortarnerillu assigisaat Danmarkimi ”naatsorsuutit qorsunnik” taaneqartarput.
Pinngortitaq mianeralugu qanoq iliuuseqarsimanermik naatsorsuisarneq Sisimiuni Sanaartornermut Ilinniarfimmi atorneqalereerpoq.
