Naatsorsuutiginngisaminnik mattattuutiinnaleqaat
Canada-p avannaani Inuialuit nunaata eqqaani Beaufortip Imartaata ilaani, Inuialuit unaatik aallaasitillu piareersaleruttorpaat.
Tassa peqquneqaramik qilalukkat qaqortat sapaatip-akunnerini arlalinni imarnersami nikeriarsinnaajunnaaqqasut pisarissagaat.
Qilalukkat qaqortat 80-it missaanniittut ikerasaap sikunnginnerani immamut sikoqanngitsumut anillaassinnaanissaat piniartut neriuutigisimagaluarpaat.
Qaammatilli kingulliup ingerlanerani ikerasak sikujartuinnavissimavoq imarnersarlu qilalukkat issimaffigisaat milliartuinnarluni.
Sapaatip-akunnerata naanerani anorersuarnera qilalukkanut ajornerulersitsiinnarsimavoq, ataasiinnarmik anillariarfissaqanngitsumik imarnersaqalermat maannalu qanoq iliuuseqartoqartariaqalerluni.
Tassalu ullumikkut qanoq iliuuseqartoqassaaq, taama oqarpoq Inuialuit piniartut peqatigiiffianni siulittaasoq, Paul Voudrach aamma qinikkatut aallartitaasoq.
Ullumikkut iliuuseqarnikkut siunertarineqarpoq ajornanngippat qilalukkat qaqortat naalliuppallaalersinnagit amerlanersaasa pisarineqarnissaat.
- Tamanna qilalukkat qaqortat nammineerlutik toquinnarnissaannit pitsaaneruvoq inuillu naatsorsuutiginngisaraluaminnik neqissaqalerlutillu mattattugassaqalernertik nuannaarutigissaqaat, piniartut siulittaasuat aviisimut The Toronto Star-imut oqarpoq.
