Naatsorsueqqissaartarfiup kisitsisaatai apeqquserneqartut

- Kisitsisit tunngavigineqartut pillugit nalorninartoqarsinnaammat tutsuiginassusaat apeqquserneqarsinnaavoq, vicepolitimester Morten Nielsen oqarpoq.

Naatsorsueqqissaartarfiup kisitsaatai naapertorlugit pinerluuteqarsimasutut eqqartuunneqartut siorna 1744-pput, ukiut qulit matuma siornatigut 400-ngajannik ikinnerullutik.

Pinngitsaaliillutik atoqateqarsimasutut eqqartuunneqartut siorna 36-upput, ukiut siuliinut naleqqiullugu 70-it pallittarsimagaat.

Kannguttaatsuliornerit siorna aamma ikileriarsimapput.

Nakuuserniarnerilli akerlianik amerleriarsimapput, soorlu aamma toqutsinerit 2002-mut naleqqiullugit amerleriarsimasut.

Kisitsisit Naatsorsueqqissaartarfiup nittartagaani saqqummiunneqaqqammerput, vicepolitimesterilli Morten Nielsenip apeqquserpai:

- Naatsorsueqqissaartarfiup kisitsisaatai sunik tunngaveqarnersut ilisimanngilara, eqqartuussinerimmi qassiunersut tunngavigineq ajorpavut, pinerluttuliortoqarsimaneranilli nalunaarutiginninnerit tunngavigisarlutigit. Pinerluttuliornerit ikiliartornersut eqqartuussinissalli piffissalerneqarnissaannut aalajangiinerit ikiliartornersut ilisimanngilara, Morten Nielsen oqarpoq.

Nakuusersimasutut eqqartuussinerit ikiliartornerat pinerluttuliorsimanerit ikiliartornerannut takussutissaanersoq, Nunatta eqqartuussiviata oqaatigisinnaannginnerarpaa:

- Kisitsisit Kalaallit Nunaanni Naatsorsueqqissaartarfiup tunngavigisai apeqquserneqarsinnaapput, tutsuiginaassusaat apeqquserneqarsinnaalllutik. Eqqartuussisutigummi suliakkiissutigineqartut aalajangiiffigineqartullu qassiinersut kisitsisaataatiginngilagut, qassillu aalajangiiffigineqartussaasut aamma kisitsisaatiginatigit, Nunatta eqqartuussiviani eqqartuussisoq Thomas Trier Hansen oqarpoq.

Kalaallit Nunaanni Naatsorsueqqissaartarfimmit oqaaseqartitsiniaraluaratta iluatsinngilarput.