Naatsiiat Nunatsinneersut Qaqortumi tuniniarneqalereerput
Naatsiiat Illorsuit eqqaanni savaateqarfimmeersuupput, Ole G. Jensen oqaluttuarpoq. Taassuma oqaluttuaraa naatsiiat kiilumut 45 koruuneqartut.
Savaatillit kattuffianni SIS-imi siunnersortip Kenneth Høeghip oqaatigaa naatsorsuutigineqartoq ukioq manna naatitat siornarnit amerlanerussasut.
- Pingaartumik neriorsuutigineqartutut sapaatip akunnerani tullermi siallilissappat, taava naatsorsuutigaara siorna naatitanit 50 tonsinit amerlanerusut naatinneqarumaartut, Kenneth Høegh Sermitsiamut oqarpoq.
Kalaallit Nunaanni Brugsenip, KNB-p, Kujataani savaateqarfimmit arfineq-marlunnit naatsiiat naatitat amerlanerpaartai pisiarisarpai.
KNB-mi pisiortornermut pisortaq Finn Christiansen oqarpoq naatsorsuutigigitsik ukioq manna Kujataanit naatsiiat naatitallu 70 tonsit pisiarissallugit.
Nutaatut KNB-p pisiniarfiisa arfineq-marluk naatitat savaateqarfinneersut Upernaviarsummilu misileraavimmeersut tuniniartalerpaat. Tamakkua tassaapput kinakålit, hjertesalatit, sommerkålit, kiisalu icebergsalatit.
- Ukioq manna naatitat oqinnerpaaffissannik isumaqatigiissuteqarsimavugut, taamaasilluni pisisartut pitsaasunik pisisassammata, Finn Christiansen Sermitsiamut oqarpoq.
Pisisartut aamma ilisimassavaat naatsiiat naatitallu savaateqarfimmit suminngaanneersuunersut.
- Pilersuisut qinnuigisimavagut pallini uagutsinnut nassiussaminni aqqitik allattaqqullugit. Taava pisisartut takusinnaavaat naatsiaat naatitallu suminngaanneersuunersut, Finn Christiansen Sermitsiamut oqaluttuarpoq.