Naatsiiat nunatsinneersut avammut tuniniarneqarsinnaanissaat Nunalerinermut Pisortaqarfimmiit misissorneqarnialerpoq

Naasut naatitallu peqqissusaat pillugu Kalaallit Nunaanni pisortaqarfeqanngimmat, taamaalillunilu naasut naatitallu pillugit ilinniarsimasumik allagartaqartoqarnani, naatsiiat nunatsinni naatitat nunanut EU-mut ilaasortaasunut nioqqutigineqarsinnaanngillat.

Sisimiuni Pilersuisumi tuniniaanermut pisortaq, Bernhard Christensen, ippassaq unnukkut Radioaviisimut oqaluttuarpoq, Danmarkimi neriniartarfiit kusanarnerusut attaveqarfigisartakkatik naatsiianik nunatsinneersunik sassaalliisarusukkaluarlutik taamaaliorsinnaanngitsut, EU-mi aalajangersakkat nunatsinni atorneqarsinnaanngitsut pissutigalugit.

Ajornartorsiut Inuussutissarsiornermut Nunalerinermullu Pisortaqarfimmi pisortamut, Peter Hansenimut Radioaviisimiit paasiniarparput.

Peter Hansen oqarpoq, apeqqut aatsaat tusarlugu.

- Nunalerinermut atatillugu naatitanik Kalaallit Nunaat avammut tuniniaasinnaasutut nalinginnaasumik eqqarsaatigineq ajorparput, eqqarsaalli nuannerpoq, naatitanik assigiinngitsunik Kalaallit Nunaat avammut tuniniaasinnaalissagaluarpat nuannissagaluaqaaq, Peter Hansen oqarpoq.

-EU-mit suut piumasaqaataanersut, piumasaqaatillu piviusunngortissinnaanerigut tamakkuninnga ilisimasalinnut misissortikkumaarpavut, Peter Hansen naggasiivoq.