Naatsiiat avammut tuniniarneqarsinnaalernissaat pilerigineqarpoq
Naatsiiat nunatsinni naatitat pisiniarfinnut ungasinngitsukkut nassiussorneqalissapput,
naatitarli taanna nunatsinniinnaq mamarineqanngilaq.
Naatsiianik nunatsinni naatitanik nunatsinni pisiniarfinnut nassiussuisarneq KNI Pilersuisup ingerlataraa, Sisimiunili Pilersuisumi tuniniaanermut pisortaq, Bernhard Christensen, allanik aamma takorluugaqarpoq:
Naatsiiat eqqarsaatiginerullugit taakku avammut tuniniartalerusukkaluaqaagut, aamma Danmarkimi neriartarfiit akimanerusut attaveqarfigisartakkavut aqqutigalugit naatsiianik misiliutissanik nassitserusussimagaluarpugut, iluatsitsinatali, oqartussaasunit tamanna unitsinneqarmat, Bernhard Christensen oqarpoq.
Naasut naatitallu nappaateqannginnissaat pillugit ilinniarsimasumik Kalaallit Nunaanni peqanngilaq, taamaammat naasut naatitallu pillugit avataaniit nunanut EU-mut ilaasortaasunut tuniniaasoqarnissaa Danmarkimi oqartussaasut akileraaruserisullu suli inerteqqutigaat, naak naatitat Kalaallit Nunaanni naatitat minguinnerpaatut oqaatigineqarsinnaagaluartut.
KNI a/s-imiit Nunalerinermut naalakkersuisoqarfimmut allakkanik maanna nassitsisimapput, nunatsinni naatitanik avammut tuniniaasalernissap periarfissinnissaanut kajumissaaralutik.
- Kalaallit Nunaat nunalerinermut attuumassuteqartutut takorloorneqarneq ajormat nangaasoqarnera paasisinnaalluarparput, Bernhard Christensen oqarpoq.
Naatitanik avammut tuniniaasarnissamut ajornartorsiutit Nunalerinermut Pisortaqarfimmiit aaqqiivigineqarsinnaappata, Pilersuisoq pilersaaruterpassuaqarpoq.
