Naatsiiassanut toqqorsivittaarnialerput

Naatsiiassanut nunarsuarmut tamarmut siaruaattussanik Svalbardimi toqqorsiveqalernissaa Nunani Avannarlerni ministeriunerit ullumi siullerpaamik malunnartippaat.

Naasut assigiinngitsut naatsiiassartaat nunarsuarmi tamarmeersut toqqorterneqartassapput.

- Toqqorsivissaq nunarsuarmut tamarmut pingaaruteqassaqaaq, nunarsuarmilu kisiartaassalluni. Toqqorsiviit allat aningaasarsiutigalugu toqqorsiviupput, Norgemi ministeriuneq, Jens Stoltenberg, Long-yearip avataani qaqqami Mine 3-miilluni nassuiaavoq.

Karrit, majsit, eertat naatsiiassallu suulluunniit nerineqarsinnaasut nunarsuarmit tmarmeersut boksimi qerititsiverujussuarmi 18 gradi tikillugu nillertissinnaasumut toqqorterneqassapput, qerititsiverujussuaq taanna qaqqami 2-300 meterisut ilorpasitsigisumiissaaq.

Svalbardimi nuna qeriuaannartoq pingasut tikillugit nillissuseqarpoq, taamaammat innaallagiaarutissagaluarpat naatsiiassat asiunissaat isumannanngillat. Sillimanissaq eqqarsaatigissagaanni Svalbard aamma naviananngitsutut nalilerneqartarpoq.

- Naatsiiassanut toqqorterivissaq nunanik piitsunik taasakkatsinnut pingaartumik pingaaruteqassaaq.

Nunat taakku ilarpassui pinngortitamik qasseeriaateqarput, uninngatitsinissamulli periarfissaloqalutik, atoqqissinnaasorpassuillu annaasarpaat, Jens Stoltenberg oqarpoq.

Naatsiiassanut toqqorsivimmik Norge 1980-ikkut ingerlaneranni pilersitsiniarluni pilersaaruteqaraluarpoq. Sorsunneq Nillertumilli taaneqartartup atuunnera russillu Svalbardimut isersinnaasimalernerat pissutigalugu tamanna piviusunngunngitsoorpoq.

Toqqorsivissaq norgemiut aningaasaannik koruuninik 30 millioninik akeqassangatinneqarpoq. Norgemi suliffeqarfik Statsbygg suliarinnittuusussaavoq, naatsiiassallu siulliit 2007-mi qeritinneqarnissaat ilimagaa.