Naatsiianik tunisassiorneq siuarsarniarpaat

Nunatsinni naatsiaat pisiniarfinni akikinnerulernissaat pitsaanerulernissaallu Pilersuisup anguniarpaa. Pilersuisup pisortaata Gerhardt Petersen-ip Kujataani naatsiianik naatitsisartut sapaatip akunnerata naanerani ataatsimeeqatigai. Ataatsimiinermi ilaatigut naatsiiat naatitaasartut pitsaassusaat eqqartorneqarpoq.

Kujataani siorna naatsiiat 92 tonsit missaat tunisassiarineqarput, tunisallu 73 procentii pitsaanerpaatut nalilerneqarput, sinneri misissoqqaartarialittut nalilerneqarsimallutik. Kujataanni Savaatillit siunnersortaat Peter Hammeken isumaqarpoq naatsiaat pisinianut pitsaanerusumik neqeroorutigineqarsinnaasut, ilaatigummi naatsiiat poortukkat nunaminertaqartarsimammata qorsunngorsimasarlutilluunniit.

Nunatta kujataani naatsiaanik tunisassiorneq ukiut sisamat matuma siorna aallartinneqarmat naatsiiat kilumut 12 kroneqarsimasut, ullumikkut kilumut 7 krone 50 øreqarput. Kilumullu akikilligaluartut tunisassiorneq imminut akilersinnaasoq Peter Hammeken oqarpoq.