Naatitat qerisut atorlugit nerissiornermut najoqqutassiaq
Naatitat qerisut atorlugit ajornanngitsumik mamartunillu nerisassianik isumassarsianik kakkersakkami nassaassaqarpoq, nerisassiallu Nunatsinni sumiikkaluaraanniluunniit ukioq kaajallallugu sananeqarsinnaasut Kalaallit Nunaanni Brugsenip, KNB-p, oqaatigaa.
Nerisassanik maangaannartitsisarnerup annikillisarneqarsinnaanissaa aamma periarfissanngortoq KNB oqarpoq.
- Naatitat qerisut atornerisigut atugassait taamaallaat qaqissinnavatit. Taamaalillutit nunarsuatsinni nerisassanik maangaannartitsinermut ajornartorsiutaaqisumut pinaveersaartitseqataasinnaavutit, KNB-p pisortaa Susanne Christensen tusagassiuutinut nalunaarummi taama ilaatigut allaserisaqarpoq.
KNB-p Anne Nivíka Grødemillu nerisassiornermik ilitsersuusiaat Kalaallit Nunaanni Brugsenip nittartagaani www.brugseni.gl-imi aaneqarsinnaavoq, illoqarfinniluunniit niuertarfeqarfiusumi aamma aaneqarsinnaassalluni.