Naatitat akisuallaaqaat

Naatitat akikinnerulerlik, pisiniarfinni tamakkusiniartilluni koorit peqqinnarnerusunik immernernissaat ajornannginnerulerniassaaq. Tamanna Ove Gramimit kajumissaarutigineqarpoq, taanna nittartakkami Facebookimi inuttut nammineq qupperniliorpoq.
novembarip 17-at 2009 09:21

Peqqinnartunik pisiniartarneq akisuallaarujussuartoq Ove Gram isumaqarpoq, taamaammat siunnersuutigaa ajornartorsiut politikerit iliuuseqarfigisariaqaraat, naatitallu akikillinissaat sulissutigisariaqarlugu. Atuagagdliutini ullumi saqqummersuni tamanna allaaserineqarpoq.

Pisiniarfinnili nutaamik periuseqalersinnaaneq aamma tikkuarpaa

- Naatitanik akikilliliinikkut pisisartunik kajungerinnilersitsisoqarsinnaavoq, immiaaqqanik, viinninik imigassanillu kimittuunik akikilliliinani. Imaassinnaavoq aamma suliffeqarfiit aningaasaliisinneqarsinnaasut, soorlu Air Greenland assartuinermut akisoqisumut tamakkiisumik ilaannakortumilluunniit aningaasaliisinneqartarsinnaasoq, Ove Gram Atuagagdliutinit issuarneqarpoq.

Ove Gram isumaqarluinnarpoq naatitat sinerissami akikillineqartariaqartut. Tamanalu Facebookimi quppernermi ilasortanit arlalinnit taperserneqarpoq, quppernermi qulequtaritinneqarluni "Nunatsinnut peqqinnerusumut naatitanut tapiineq".

Inuit arlallit iipilimik ataatsimik pisiniaraangamik 12 koruunimik akiliisariaqartarnertik naammagittaalliuutigaat. Arlallillu aamma tikkuarpaat naatitat asioreersut pisiniarfinni taamaallaat pisiarineqarsinnaasarnerat.

Ove Gramip Facebookimi qupperneranut 600-ngajaat ilaasortaapput.