Naatitanut pisortaqarfik
Nunatsinni inuussutissat pillugit pisortaqarfimmik pilersitsiniarnermi periarfissat suunersut eqqartorniarlugit nunatsinni Danmarkimilu inuussutissanik nakkutilliisoqarfinni atorfilittat Københavnimi ataatsimeeqatigiissimasut, uumasut nakorsaasa pisortaat Lasse Holm nalunaaruteqarpoq.
- Aallarniutaasumik eqqartueqatigiippugut. Immikkut akuersissuteqaqqaarluni nunanut allanut tunisisoqartarmat, ajornannginnerusumik tunisisinnaalernissaaq suliniutiginialerparput. Tamatuma qanoq naleqartiginissaa nalilersortinniarparput, Lasse Holm oqarpoq.
Nunatsinni naatsiianik naatitsisartut nunanut allanut tunisisarnermikkut amerlanerusunik kaaviiaartitsinissaat eqqartoqatigiissutiginiarlugu Danmarkimi naatitanik pisortaqarfiup naalakkersuisut qaaqqusimavaat.
Naatsiianik nunanut allanut tuniniaassatilluni, naatsiiat nappaateqannginnerannik uppernarsaammik naatitanut pisortaqarfimmit pissarsisoqaqqaartariaqarpoq. Nunatsinnilu suli pisortaqarfimmik taamaattumik peqanngilagut.
- Naatsiianik nunatsinneersunik nunanut allanut tuniniaasoqarsinnaanera suli neriunartoqarpoq, Lasse Holm erseqqissaavoq.
