Naatitanik Narsami naatitsivittaarput

Kalaallit Nunaanni inuussutissarsiutigalugu naatitanik naatitsivissaq Narsami Inuussutissalerinermut Ilinniarfimmut, Inuilimut, Narsami itunniunneqartussanngorpoq, 2007-imit ingerlatassanngorlugu.

- Aallaqqaataasumik misiligutissatut ukiut aappaata qeqqa matuma siorna pilersaarusioqqaalerpara. Taama isumassarsininnut pissutaapput naatitat tikisinneqartartut ajorpallaartarneri, nassiunnerinullu aningaasartuutaasartut amerlavallaartarneri, naatitsiviliornissamik aallartitsisoq, teknikkimut tunngasunik titartaasartoq, Bent Brede Olesen, Narsameersoq oqarpoq.

Naatitsisarfissaq saviminernik sanaajusoq 77 m2-tut angitigaaq, seqernullu kissaa iluaqutiginerullugu kiassagaassalluni, aammali kissarsuut uuliatortoq kiassaatitut aamma isumalluutaassaaq.

Oqaatigineqartut malillugit naatitsivissaq issittumut naleqqussagaavoq.

Inussutissalerinermik Ilinniarfik, Inuili, misiliilluni naatitanik naatitsisalissaaq, kingorna akilersinnaasumik ingerlasinnaasoq paasineqarpat naatitsivissaq alla 1200 m2- tut annertutigisoq sananeqassasutut pilersaarutaasoq, Bent Brede Olesen oqarpoq.

Naatitsiviliaq 530 tusind koruunit missaannik akeqarsimavoq. Tapiissuteqarsimasullu tassaapput Narsap Kommunia, Nuna Fond, Grønlandsbank-ip Innussutissarsiornermut Aningaasaateqarfia, taassuma seqernup nukinganik tigooraasut akilersimallugit, kiisalu Kalaallit Nunaani takornariaqarnermi Inuussutissarsiornermilu siunnersuisoqarfik aamma tapeeqataasimavoq.