Naasut uumasullu mianerisariallit
”Nunatsinni naasut uumasullu mianerisariallit” –Avatangiisinut Pinngortitamullu naalakkersuisoqarfimmiit atuagassiaq taamatut taaguutilik ullumi saqqummersinneqarpoq. Naalagaaffiit Peqatigiit iluanni nunat 190-it atsioqataaffiigisaat naapertorlugu aamma Kalaallit Nunaata mianerisariallit allattorsimaffiinik saqqummersitsinissaq pisussaaffigaa. Mianerisassat nalunaarusiornerisigut uumassusillit suut nungutaanissaminnut ulorianartorsiortinneqarnersut ersarissarniarneqarpoq. Mianerisassatut allattorsimasut 115-it 34 procentii annerusumik minnerusumilluunniit nungutaanissaminnut ulorianartorsiortinneqarput.
juulip 23-at 2008 15:43
Mianerisassat ulorianartorsiortinneqarnerpaat taassaapput arfiviit arlaat, Nordkaperimik taaneqartartut – arfiviillu Svalbardip eqqaani uumasut. 1900-kkut aallartinneranni taakkua piniapilunneqarsimanerat tamatumunnga pissutaavoq. Taakkua saniatigut qilalugaq qaqortaq, kitaanilu qilalukkat qernertat nungutaasinnaanerminnut ulorianartorsiortinneqartutut allassimapput. Nalunaarusiami ullumikkut taakkua piniarneqarnerat nungusaataasutut taaneqarpoq, ullumikkut pisassaritinneqartartut ingerlaannassappata ukiut 45-t qaangiuppata qilalukkat qaqortat nungussinnaanerat aarlerigineqarluni. Kitaani qilalukkat qernertat ukiumut 150-inik ilanngarneqartuaannassappata ukiut 30-t qaangiuppata nungunnissaat ilimagineqarpoq.
