Naartuut kviksølvilu

Allattoq Najaaraq Egede
juunip 27-at 2007 07:12

Nunatsinni uumasunik imarmiunik, soorlu puisip arferullu neqaanik nerisaqarneq timip kviksølvimik akoqarnerulerneranik kinguneqartarpoq.

Timip kviksølveqarneranik misissuineq naartuunik 403-nik taakkulu meerartaavinik Naalagaaffiup Innuttaasut peqqissusaannik misissuisarfianit ukioq 1999-imiit 2006-imut ingerlanneqarsimavoq.

Arnat ulluinnarni inuunerannik, ilinniagaannik, nerisaqarnerannik, pujortartarnerannik, imigassamik atuinerannik nappaateqarnerannillu apersorneqarsimapput, peqatigitillugulu akuutissanik arrortikkuminaatsunik timaanniittoqarnersoq aaversinnikkut nujaasalu ilaannik peersilluni misissuinikkut paasiniarneqarsimavoq. Aamma arnat meerartaartut qalatsip aavanik immoqalerpatalu immuanik misissuiffigineqarsimapput, soorluttaaq meerartaareernermik kingorna qaammatit arfinillit qaangiunneranni inuunerat pillugu apersorneqaqqittarsimasut.

Naartuut pingasuugaanga marluk timaat kviksølveqarnissamut killiliussamik 1,0 mikrogrammimik qaangiisimapput, nujaanni agguaqatigiissillugu 1,3 mikrogrammimik kviksølveqartoq paasineqarmat.

Kalaallilli arnartaat uumasunik imarmiunik nerisaqartuni kviksølveqarnersaanngillat, tassami Savalimmiormiut Canadamilu Nunavimmiut arnartaat timiminni kviksølveqarnerummata.

Issittumi misissuisarfimmi professori Peter Bjerregaard isumaqarpoq, kalaallit arnartaasa timiminni kviksølvimik qummut killissaq qaangerlugu akoqarnerat arnap meeraatalu peqqissusiannut akornutaanavianngitsoq.