Naartutillutit aalakuunngilluinnarit!

Naartutillutit aalakuunngilluinnarit! Malittarisassat nutaat Danmarkimi Peqqissutsimut Qullersaqarfimmeersut saqqummersussat taama oqariartuuteqarput. Tassami misissuinerup nutaap takutippaa nukappiaqqat kinguaassiuutimikkut innarluuteqarlutik inuunissaat ilimanaateqarnerulersartoq, anaanaasoq naartunermi nalaani imigassartortarsimappat.

Imerniartarfimmi allamiluunniit nillarissumik ataasinnguartorsinnaaneq ilorrisimaarnartaqaaq. Kisianni naartutilluni imigassartorneq sianiilliorneruvoq. Tassami misissuinerup nutaap takutippaa naartutilluni imigassartorneq sianiilliornerujussuusoq, taamaattumik Danmarkimi Peqqissutsimut Qullersaqarfimmit naartusunut malitassanik nutaanik saqqummersitsiniarput.

Manna tikillugu Peqqissutsimut Qullersaqarfimmit innersuussutaagaluarpoq naartusut ullup unnuallu ingerlanerani ataatsimik baajatorsinnaasut, tassa ataasinnguartunngitsoorneq saperunikku. Maannali malitassat sakkortusiniarneqarput, naartusut imigassartunngivinnissaannik siunnersuisumik.

Taamatut sukannernerusumik innersuussuteqartoqarpoq misissuinertigut paasineqarmat anaanaasoq naartunermi nalaani imigassartortarsimappat naartumut akornutaasinnasoq. Tassa maanna Rigshospitalimit misissuinerit nutaat uissuumminartut saqqummiunneqarput. Taakkunani takuneqarsinnaavoq naartusut sapaatip-akunnerata ingerlanerani tallimanik amerlanerusunilluunniit ataasinnguartortartut naartumik nukappiaqqap kinguaassiuutitigut innarluuteqarlutik inuusinnaanerat pingasoriaammik ilimanarnerulersittaraat.

Nakorsaaneq Katharina Main, Rigshospitalimeersoq oqarpoq misissuinikkut paasineqarsimasoq anaanaasoq immannguarluunniit imigassartortarpat, taava nukappiaqqap inoorlaap issui nakkartooqqaannalersinnaasut.

- Naartutilluni imigassaq pinaveersaarneqartariaqarpoq, tamanna qularutissaanngilluinnarpoq, nakorsaaneq TV2-mi nutaarsiassanut oqarpoq.

Kinguaassiuutitigut innarluuteqarnerup kinguneranik angutit inersimasut ullumikkut anisuumik pitsaassusaanik ajornartorsiuteqartarput.

Danmarkimi Peqqissutsimut Qullersaqarfimmit malitassat nutaat januaarip ingerlanerani saqqummissapput.