Naartut tussiarfigineqartarput

Arnat naartusut oqaluffimmiit maanna neqeroorfigineqartalersimapput, erninissaminnut piareersarnerminni ernisussiortumik peqateqarlutik palasiliartaleqqullugit, taava tussiaqatigiillutik.

Aviisi, Kristeligt Dagblad, taama allaaserisaqarpoq.

"Naartut tussiarfiguuk” Københavnip ilaani, Frederiksbergimi, oqaluffissuarmi, Godthåbskirkemi, pisarpoq, erninissaq sapaatip akunnerinik sisamanik sioqqullugu, taavalu ernereernermiit aamma sapaatip akunnerini sisamani.

Meeraaqqanut taama tussiartarneq oqaluffinni ukiut arlaqanngitsunnguit ingerlaneranni nuannarineqartorujussuanngorsimavoq, Danmarkimilu anaananngortussanngorpassuit anaananngoqqammersullu nuunuutitik peqatigalugit tussiffattarput.

Tussiaqatigiitarnermik aallartitsisunut ilaavoq, nipilersornermik ilinniarfissuarmi, Det Kongelige Danske Musikkonservatoriami, arnaq professori, Inge Marstal. Taanna aamma isumaqarpoq, naartut tussiarfigineqartarnerat isumassarsiatsialaasoq.

- Naartut inunngornissaminnut nakuunerulersarput. Inersimasuni allaat malugisarparput, naartuunerminni nipit tusartarsimasatik ilisarisinnaasaraat, Inge Marstal oqarpoq, aperineqaramilu naartut immaqa allaat tussiaqataasarnersut, akivoq:

- Naartut nipaat soorunami suli ineriartorsimaneq ajorput, kisianni immaqa sianissutsimikkut tussiaqataasarsimassasut.