Naartusut tamarmik ukiortaamiit misissorneqartalissapput

Peqqissutsimut Pisortaqarfiup aalajangiuppaa, naartusut tamarmik 2006-imi januaarip aallaqqaataa aallarnerfigalugu misissorneqartalissasut. Taama misissuisoqartalernissaanut tunngaviuvoq, nappaatit toqussutaasartut nunatsinni atugaaqisut marluk meeqqat nappaatigilersinnaaneraat paasiniarneqartassammat.

Nappaat siulleq tassaavoq, kalaallit tingulluutaat kingornuttagaq. Meeraq inunngoqqammiinnartoq malunniuttartoq. Meeqqamut inuummarlutitsisarpoq, sungarpallatsitsilluni, qinngakkut aatsitsilluni, ammikkut ungilatsitsilluni aammalu saarnit nappaataannik nappaateqalersitsilluni.

Nappaatillu aappaa tassaavoq, timip inuussutissanik suliarinninneratigut meeqqap inunngorneraniit ulluni siullerni marlussunniit sapaatip-akunnialunnguit qaangiukkaangata malunniuttartoq. Meeraq taama ittumik nappaateqaruni meeraq tassanngaannaq ajortittarpoq, kissarneerutingajalluni, amia qaserujutsilluni anersaartorniarneralu ilungersunarsilluni, nappaammullu tassunga ullumikkut suli iluamik katsorsaatissaqanngilaq. Misissuisut isumaqarput, angajoqqaat tamarmik nappaatit taakku arlaat timiminniitikkunikkit, meeqqap taama nappaateqalersinnaanera 25 procentimik aarlerinaateqartoq.

Peqqissutsimullu pisortaqarfik aalajangerpoq, januaarip aallaqqaataaniit arnat naartusut tamarmik aaversinnikkut misissorneqartalissasut.

Ernisussiortoq Esther Hammeken aperaarput, arnaq angullu tamarmik aavi taama ittunik akoqarpata, meeraq naartoq qanoq pineqassanersoq.

- Arnaq naartusoq sapaatip-akunnerit 14-t 16-illu akornanni ernganik peersivigitilluni misissortissinnaavoq, naarmiua tunillanneqarsimanersoq. Tamatuma kingunerisinnaavaa, taassuma naarmiuata nappaat taanna kingornussinnaappagu, taava arnaq peersitsinermik neqeroorfigineqassaaq.

- Nunatsinni taassuminnga kingornuttakkamik nappaatillit amerlaqigamiik?

- Oqaatigineqarpoq 7 procentip iluaniittoq taavalu nuna tamakkerlugu eqqarsaatigigaanni avinngarusimanerusut avannaaniinnerusoq aammalu tunumiinnerusoq atugaasoq. Tamanna peqquteqarpoq, immaqa inuiaqatigiinnguit iluanni ungasissumik ilaqutariillutik aappariileraangamik kinguaassiulerlutillu, taava taanna saqqummerajunnerusarmat, Esther Hammeken oqarpoq.

Peqqinnissaqarfimmiit naatsorsuutigineqarpoq, siunissaq ungasinnerusoq eqqarsaatigalugu, tamatuma tuniluunnera annikilliartorumaartoq.