Naartuersittartut nappaatipiluttartullu suli amerlavallaarput

Inuusuttut akornanni naartuersittarneq suli atugaavallaarpoq, ilutigisaanillu kinguaassiutitigut nappaatit aatsaat taama amerlatigaat.
marsip 26-at 2008 12:42

Kisitsisit Meeqqat Inuusuttullu Pillugit Ilisimasaqarfik, MIPI, misissuereerluni nalunaarusiaani takuneqarsinnaasut malillugit 1981-imiit naartuersittartut amerleriarsimapput. Taamanikkut naartuersittut 600-t ataassimavaat ullumikkullu 800 sinneqartut ukiumut naartuersittarput, tassa inunngortoqaraangat ilutigisaanik allamik naartuersittoqartarpoq.

Tamatuma peqatigisaanik inuusuttut 15-nit 19-inut ukiullit gonorremik aamma chlamydiamik nappaatillit ukiuni kingullerni qulini amerleriarsimaqaat.

Inuusuttut gonorremik nappaatillit ukiut qulit matuma siornagumut sanilliullugu marloriaatinngorsimapput, aamma chlamydiamik nappaatillit nalunaarutigineqartut amerleriarsimaqaat. Assersuutigalugu 1997-imi chlamydiamik nappaatillit nalunaarutigineqartut 600-t missiliorpaat taakkulu 2006-imi 900-t sinneqalersimapput.

Naak paasisitsiniaasarnerit amerlagaluaqisut inuusuttut akornanni naartunaveersaatinik atuineq ukiuni kingullerni allanngorsimanngitsoq MIPI naliliivoq.

Nunatsinni meeqqat inuusuttullu affaat atugarissaarnatik peroriartortut

nalunaarusiami ilaatigut atuarneqarsinnaavoq. MIPI-p ilaatigut inuusuttut atoqatigiittarnerat misissuiffigisimavaa.