Naartuersinneq akeqaleqquaat
Ukioq kingulleq Qaqortumi inunngortut 63-iupput, naartuersittut 87-iullutik.
-Kakkaak, ingasappallaaqaaq. Naartuersinneq akisuujusoq tusartarparput, akiliisalertariaqarput, ikanngilagut, Malakias Sikemsen oqarpoq. Sisamariarluni naartuersittariaqarsimasoq massakkut 26-inik ukiulik isumaqataavoq:
-Inuusuttuaqqat inuusuttullu akissaqarpallaanginnamik akiliisoqartalerpat mianersornerulissagaluarput, Najaaraq Petersen oqarpoq. Taanna inuusuppallaarnini pissutigalugu sisamariarluni naartuersittariaqarsimavoq. Pinaveersaartitsiniarnermi iliuuserineqarsinnaasut alla aamma eqqarsaatigineqarput.
-Aappariinerup avataatigut meerartaarsimagaani ataataasup akiliutigisartagaa qaffanneqarsinnaavoq, Qaqortumi ernisussiortoq Magrethe Kruse Jensen oqarpoq.
Kissaatigisamik meerartaarniartarnissaq pingaaruteqaqisoq, kiisalu angajoqqaat meeqqaminnut inuusuttuaranngulersunut oqaaqissaarisarnissaat pingaaruteqaqisoq, Qaqortumi inunnik isumaginninnermi siunnersorti Ida Abelsen oqarpoq. Atuisut akiliuteqartalernissaat siunissami pinngitoorneqarsinnaanavianngitsoq taanna aamma isumaqarpoq.
