Naapeqatigiittussarpassuit

februaarip 09-at 2007 17:08

Kulturikkut eriagisassat utertinnissaat pillugit,

grækeri, maoreq, kenyamiu, saami eqqilillu Nuummi marlunngorpamiit naapisinniarneqarput.

Taama ataatsimeersuarnissamut qaaqqusisuuvoq Nunatta Katersugaasivia.

Peqataasussat 80-it missaanniittut akornanni inatsisilerituut, itsarnisarsiuut, antropologit, nunallu inuii isumaqatigiissinnaanngitsut oqaloqatigiissinnerisigut malittarisassaliortoqassaaq. Taamaalilluni kulturikkut eriagisassat akerleriinnermik tunngaveqaratik, suleqatigiinnermik ataqqeqatigiinnermillu tunngavilerniarneqassallutik.

Tamannami pisinnaasoq katersanik eriagisanik 35.000-usunik Danmarkip Kalaallit Nunaanut iluatsilluartumik utertitsinerata takutippaa. Akerlianik nunarsuarmi allami tamatuma tungaatigut siammasissumik inissisimasoqartoq.

Siuaasamimmi saarngisa iliveqqinniarneri pillugit Amerikami eqqillit nunarsuarmiut allat katersugaasivii eqqartuussisunut ilaatigut tunniuttalerpaat.

Issittup ukiua aallarnisarniarlugu ataatsimeersuarneq Nunatta Katersugaasiviata aaqqissuuppaa, taamaalilluni Nunarsuup Avannaarsua Issittoq nunap assingani naqissuserneqaqqullugu.