Naapeqatigiissinnaasunik inatsisartutaalerunarput
Nunami Irak-itut ittumi akaareqatigiilluni inuuniarneq pissaaneqapilunniarnermit ajugaaffigineqartuartumi ingerlalluatumik inatsisartoqartoqarsinnaanngitsoq qularinninniartunit oqaatiginiarneqartarnera piviusunngunngitsuulerpoq. Irakimi inatsisartut inatsisinik pingasunik pingaaruteqarluinnartunik ippassaq akuersipput. Naalakkersuinikkut iligiikkuutaat pingasuusut, kurderit, sunnimuslimit shiamuslimillu amerlanerussuteqartut, siunnersuummik akuersipput.
Arlaannaalluunniit ajorsartinneqanngilaq.
Inatsit ataaseq - pillaatissaraluamik isumakkeerfiginnissut - angutinut tusintilippassuarnut – amerlanerpaartaat sunnimuslimiusunut - Irakillu naalakkersuisuisa parnaarussiviani inissisimasunut - akuerineqarpoq.
Ukiormannamut aningaasanut inatsit 250 milliardi koruuninik aningaasartuutitaqartoq akuerineqarpoq. Kiisalu Irakimi nunap immikkoortuani isumalioqatigiissitanut oktobarip ulluisa aallaqaataat ulloq qinersivissatut akuerineqarluni.
Inatsisartunut qinigaasunit 275-init 250-it najuupput. Siunnersuutinut ataasiakkaanut isumaqataanngitsut akerliullutik qinersinngillat. Ataatsimiinnerup naanerani inatsimmut siunnersuutit pingasut ataatsimut taasisitsivigineqartussanngormata najuuttunit tamanit peqataaffigineqarlutik akuerisaapput. Ajornartorsiullu isumaqatigiissutip immikkuualuttuaniippoq. Pillaatissaraluamik isumakkeerfiginnissut kikkunnut atuutissannginnersoq sunnimuslimit akornanni aalassatsitsissutaasinnaavoq. Aningaasanut inatsit akuerineqarpat kurderit nunap avannaaniittut namminersortunngorsaanermut atugassanik uuliamik isertitat 17 procentiinik tigumminniinnarnissaat ajornaatsuinnaassangatinneqanngilaq. Taamattorli Saddamip uppisinneqarneratali kingorna aatsaat taama isumaqatiginninniarnissamut piumassuseqartoqartigisoq alaatsinaatsunit oqaatigineqarpoq. Al Qaedap sakkutuui ikilisinneqarput, nunallu immikkoortuanut Anbar-imut qimaatinneqarlutik, uuliasiorneq ingerlalluaqqilerpoq. Kurderit, shiamuslimit sunnimuslimillu aammik kuutsitsinerup kingorna qasusimaqisut mianersortumik imminnut qanillattoqqilerput.
