Naanguku angajoqqaat?
Angajoqqaat suleqataanerat atuarfiup atuartitsinermi tunniussaatut pingaartigaaq.
Taama nalunaarpoq Qaqortumi atuarfiup siulersuisui angajoqqaat peqataanerunissaannik ujartuinermini. Erseqqissaatigaalu Qaqortormiut kisimik tamatuminnga ajornartorsiuteqanngitsut.
- Kujataani atuarfinni assigiissuteqaqaagut: Angajoqqaat
peqataannginnerat ajornartorsiutigivarput, aningaasat amigarneri,
ilinniarsimasunik ilinniartitsisussaaleqineq allarpassuillu, taama Qaqortumi Tasersuup atuarfiani siulersuisut siulitaasuat Alibak Hard atuagassiami Kujataamiuni saqqummerlaami allappoq.
Atuarfiup angajoqqaallu pisussaaffii meeqqat atuarfiat pillugu peqqussimmi 2008-imeersumi allassimapput. Tassani allassimasut ilagaat meeqqap ineriarnerani atuarfik angajoqqaallu qanimut suleqatigiittussaasut.
- Angajoqqaat atuartuutillit tamarmik meeqqap ilikkagaqarnissaa akisussaaffigivaat. Atuarfiliartaritsi, oqalliseqataagitsi atuarfimmilu pisoqaraangami orniguttaritsi, soorunami meeraq ilagisinnaavarsi, taama Alibak Hard kajumissaarivoq.