Naammagittaalliortarfik suliassarpassuaqalersimavoq
Inunnik isumaginninnermi kommunit aalajangiinerini
Naammagittaalliortarfik, Det Sociale Ankenævn, Nuummi ullumi ataatsimiittoq suliassanik qannippoq.
Suliassat 350-it, nutaanngitsullu ilaasortat tallimaasut suliaraat.
Siulittaasoq Ole Rud radioaviisimut oqarpoq, suliat amerlinerinut pissutaanerpaasimasoq, innuttaasut paasilersimammassuk kommunini aalajangikkat naammagittaalliutigissallugit pisussaaffeqarnertik.
Naammagittaalliuutit pillugit oqarpoq:
_ Immaqa amerlanaangajappakka, kisianni tassa 300-it 350-sillu akornanni naammagittaalliortarfimmi suliarineqarnissaminnik uninngapput.
Innuttaasut kisimik naammagittaalliorneq ajorput aamma kommunit naammagittaaliuutaat suliassarpassuit akornanniipput.
_ Suliassat ilarpassui tassaapput, innarluutillit pillugit Naalakkersuisut aalajangiinerinut kommunit naammagittaalliuutaat. Tamakku saniatigut siusinnaarluni pensiuninut, ineqarnermut tapiissutinut tunngasut aamma naammagittaalliuterpassuupput.
Naammagittaalliuutit ilai 2003-minngaanneerput tamakku Ole Rud-ip nuannarinngilai.
_ Ajoraluartumik suliassat ilai 2003-miilli pisut suli pigaavut aalajangiiffigineqarsimanngitsut. Tamatumunnga pissutaagajunnerarpaa naammagittaalliuutit pillugit kommunit nalunaaruteqarnissamik pikkorippallaannginneri. Naammagittaalliortarfimmi ilaasortat qaammatit pingasukkaarlugit ataatsimiittarput. Suliasserineq ilaatigut qaammatini arfinilinni sivisusseqarsinnaasarpoq
ilaatigut ukioq ataaseq. Qaammatilli arfiniliunissaat anguniarneqarpoq. Sulialli amerliartorput. Tamanna sulisumik pisariaqartitsivoq, inatsisilernermi sulisup aamma socialrådgiverip saniatigut, ilinniagartooq ullup affaa sulisartoq, Ole Rud naggasiivoq.
