Naammagittaalliorlutik allagaqarput

- Ilisimatusarfik pillugu inatsisissatut siunnersuut nutaaq atorsinnaanngilaq, Sermitsiap nittartagaanut taama allapput.

Isumaqatigiinngissutaasoq tassaavoq aqutsineq pillugu inatsisissatut siunnersuut nutaaq Inatsisartuni pingasunngormat aappassaaneerlugu oqaluuserineqartoq. Inatsisissatut siunnersuut naapertorlugu Ilisimatusarfimmi pisortaq, pisortap tullia, immikkoortortanilu pisortat ilisimatusarnermik tunuliaqutaqanngikkaluarlutik atorfinitsinneqarsinnaassapput. Ilinniartitaanermut pisortaqarfimmit tamatumunnga tunngavilersuutigineqarluni qinnuteqarsinnaasut amerlerusunneqarnerat – ingammik kalaallit qinnuteqarsinnaanissaat periarfissikkumallugu.

- Tamatuma kingunerissavaa nunani tamalaani piumasarineqaataasartut Ilisimatusarfimmi naammassineqanngitsoornerat, tamannalu Ilisimatusarfiup universitetitut isigineqarneranut sunniuteqassaaq.

Aqutsinissamut inatsit siunissami Ilisimatusarfiup, ilinniartitsisunngorniarnerup, isumaginninnermi siunnersortinngorniarnerup, peqqissaasunngorniarnerup, tusagassiortunngorniarnerup Inerisaaviullu kattunneqarnissaannut tunngaviliisuussaaq.

Taamaattorli Ilisimatusarfimmi ilinniartitsisut ukiuni tallimani arfinilinniluunniit ikaarsaariarfeqarnissaa ujartorpaat, taamanikkussamummi ilinniarfiit tamakkerlutik kattunneqarsinnaassammata. Ukiullu taakku qaangiuppata kalaallit ilisimatusarsimasut amerlanerulersimassapput, taakkulu pisortatut atorfiit inuttalersinnaassagaat Ilisimatusarfimmi ilinniartitsisut isumaqarput.