Demokraatit: Naammagisimaarnaqaaq
![](/sites/default/files/styles/image_934x467/public/49ea3b0a-b80e-4c25-987b-7548ec795eef.jpeg?itok=--WeqH-m)
2015-imi folketingemut qinersisoqarneraniit demokraatit procentinik marlunnit siuariaateqarput 2262-inik taaguunneqaramik, tamanna siulittaasuugallartumit Randi Vestergaard Evaldsenimit naammagisimaarneqangaatsiarpoq.
- Nuannarisorujussuuarput suli partiit anginerpaat pingajuattut inissisimagatta, taamaalilluta aamma takutipparput suli partiinut anginerpaanut marlunnut unammillertitut inissiimanerput, Randi Vestergaard Evaldsen oqarpoq.
Qinerneqarluartartoq Nivi Olsen 1600-nit taaneqarpoq, tamannali Demokraatit folketingemiititaqalernissaannut naammanngilaq. Taakkua nunatsinnit qiningaasunut marlunnut suleqatiginninnissaminnik tunaartaqarput.
- Qularutigineqassanngilaq aamma demokraatiniit folketingemi issiatitaqanngikkaluarluta sunniuteqarsinnaangatta, Randi Vestergaard Evaldsen oqarpoq.
Demokraatit pineqaatissiisarnermut tungasut sukaterneqarnissaat folketingemit ukiuni sisamani tulliuttuni eqqumaffigineqarnerunissaat neriuutigaat.
- Pineqaatissiisarnerup iluani sukaterinissat, inatsisitigut sukaterinissat, politeeqarnerup iluani aaqqiissutissat anstalteqarnerullu iluani aaqqiissutissat tamakkuupput ilaatigut aamma neriuutigisagut massakkut issiasut suleqatigiissinnaallutik aaqqiissutissanik ujartuisinnaanerat, Randi Vestergaard Evaldsen oqarpoq.
Ulluni tulliuttuni Danmarkimi, Mette Frederiksen naalakkersuisunngortitsinissaminut ministeriuninngornissaminullu partiinut allanut isumaqatigiiniassaaq.