USA-p præsidentiata Donald Trumpip tusagassiorfinnut nunarput pisiarerusullugu arlaleriarluni oqaatigisimavaa. Assi: Scanpix

Immikkut ilisimasalik: Naamik, Trumpip Kalaallit Nunaat pisiarisinnaanngilaa

USA-p præsidentiata nunarput pisiarerusullugu arlaleriarluni oqaatigisimavaa. Taamaaliortoqarsinnaanngitsorli immikkut ilisimasallip oqaatigaa

Amerikamiutut passitaaruit qanoq igissaviuk?

USA-p præsidentiata Donald Trumpip tusagassiorfinnut nunarput pisiarerusullugu arlaleriarluni oqaatigisimavaa.

Tamaaliortoqarsinnaava?

- Naamik. Taamaaliortoqarsinnaanngilaq, Ilisimatusarfimmi inuiaqatigiilerinermi adjunkti Rasmus Leander Nielsen oqarpoq.

Sorsunnersuup aappaata kingorna nunasiaajunnaarsitsineq ineriartulerpoq. Naalagaaffiit Peqatigiit inuiaat pisinnaatitaaffiinik inatsisiliornikuusoq Leanderip erseqqissaatigaa. Inatsisit nunatsinnut aamma atuupput.

AAMMA ATUARUK Donald Trumpip Kalaallit Nunaat pisiariniarlugu takorlooraa

- Danmarkip Kalaallit Nunaat avaqqutiinnarlugu tuniniaanissaa ilimaginngilluinnarpara. Tassami aamma Namminersorluni Oqartussaaneq pillugu inatsit malillugu taamaaliortoqarsinnaanngilaq, Rasmus Leander Nielsen oqarpoq.

Soqutiginnittut arlaqartut

Amerikamiut tusagassiorfiisa ilaannit Wall Street Journalimit Washington Postimiillu oqaloqatigineqartut naapertorlugit Donald Trumpip nunarput pisiarinialikkersaarpaa.

AAMMA ATUARUK Namminersorlutik Oqartussat: Niueqateqarusuppugut kisianni tuniniagaanngilagut

USA-p Kina aamma Rusland Issittumi akerleralugit isertuutinngilaa, tassami Issittoq silap allanngoriartornera pissutigalugu ukiuni makkunani nutaatut imarpinngoriartormat.

Nunarput taamaammat USA-mi qitiusutut taaneqartarpoq.

Amerikamiut Pituffimmi sakkutooqarfeqarput, nunatsinnilu mittarfeqarfinnut allanut suleqateqarsinnaanissartik neriuutigaat.

Naamik, qujaannaarpunga

USA-p præsidentiata Donald Trumpip Kalaallit Nunaannik pisinissaminik soqutiginninnerarsimanera uissuumisitsivoq. Nunarpulli nioqqutaanngitsoq nunanut allanut tunngasunut naalakkersuisoq Ane Lome Bagger oqarpoq.

- Niueqatigiinnissamik ammavugut. Kisianni nunarput tuniniagaanngilaq, nunanut allanut tunngasunut naalakkersuisoq, Ane Lone Bagger Reutersimut oqarpoq.

AAMMA ATUARUK Aaja Chemnitz Larsen: Kalaallit Nunaat tuniniagaanngilaq

Naalakkersuisut siulittaasuat Kim Kielsen aamma pileritsanngilaq.

USA pitsaasumik suleqatigaarput, saqqummiunneqartorlu una nunatta periarfissarititaannut aningaasaliinissamut suli annerusumik soqutiginninnertut nalilerusupparput. Soorunami nunarput tuniniagaanngilaq, Kim Kielsen oqarpoq.

Trumpip nunatsinnik pisiarinnikkusunnera amerikamiunit uppernarsineqanngilaq.

Amerikamiut præsidentiisa nunatsinnik pisiniarnerminnik eqqarsaateqartarnerat siullermiilinngitsoq, nutaarsiassaqartitsvik AP allappoq.

USA-p 1946-mi præsidentiata Harry Trumanip nunarput 100 million dollarsinik akilerlugu pisiniarsimagaluarpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat