Naamaarneq umiatsiamut ikuallassutaagunartoq

Ippassaq unnukkut aqqarngup qaangilaarnerani, Nuummi Kangerlukasimmi Avannarlermi, Fiskerbyp ataatungaani, kommunip umiatsianut talittarfiani, qaartoortoqarneranik tamatumalu kingorna ikuallattoqalerneranik Nuummi politiit nalunaarfigineqarput.
Allattoq Elisa Isaksen
septembarip 28-at 2011 06:23

Inneq angisooq umiatsiameersoq qaartoornertut isikkulik takussaavoq, inuillu tamaangaaniit nilliallutillu arpattut, Fiskerbymi najugallit ilaasa takusimavaat.

Nuummi politiini pigaartup oqaatigaa, umiatsiami ikuallanneq gassip puuata dunkiusap qaarneratigut pilersimassangatinneqartoq.

Nivissat marluk 18-it inorlugit ukiullit pisumut attuumassuteqarnerarneqarput, politiillu gassimik naamaartoqarsimanissaa ilimatsaappaat.

Nivissat marluk pineqartut aappaa, kiinnamigut assammigullu sakkortuunik uutitersimalluni napparsimmavimmut unitsinneqarpoq, aappaalu annikinnerusunik uutitersimalluni napparsimmavimmut aamma unitsinneqarluni.

Nivissat ajoqusersimanerat pissutigalugu qanorpiaq pisoqarsimaneranik politiinit suli killisiorneqarsinnaanngillat.

Umiatsiaq qaartoorfigineqartoq atorsinnaajunnaarluni  ajoquserpoq, qaartoorfiusullu sinaaniittut umiatsiat allat marluk ikuallannermit aamma ajoquserneqartut, Nuummi politiinit ilisinmatitsissutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq