Naamaarneq Sisimiuni ajornartorsiutaavoq

Sisimiuni meeqqat inuusuttuaqqallu naamaarnermut silaqanngillat. Puiaasarsuit gassimik aamma beziinamik imallit isumannaatsumut ilisaqqullugit Sisimiuni suliffeqarfiit politiiinit qinnuigineqarput.
maajip 25-at 2010 09:45

Meeqqat inuusuttuaqqallu naamaartut arlallit Sisimiuni politiinut sapaatip akunnerata naanerani nalunaarutigineqarput.

Asummiuni innaallagissamik allanngortiteriviup eqqaani gassit puukui imaqanngitsut tallimat tallimanngornermi nassaarineqarput.

Aqaguani arfininngornermi politiit aamma aggersarneqarput. Tamatumuuna inuusuttuaqqat sisamat illuliarsuup eqqaani naamaartut naammattoorneqarlutik. Taakku tamarmik politiinit angerlaanneqarput.

Sisimiuni politiit ippassaq aamma illuliortunit nalunaarfigineqarput puiaasarsuaq gassimik 33 kilomik imalik tillinneqarsimasoq. Taanna puiaasaq nassaarineqarpoq, ilimagineqarporlu naamaarnermut atorneqarsimasoq.

Nukappiaraq 14-inik ukiulik politiinit ippassaq aaneqarpoq, taanna qamuteralaat orsussaannik benziinamik naamaartoq takuneqarsimammat. Taanna aamma angerlaanneqarpoq isumaginninnermillu suliallit paasitinneqarlutik.

- Sisimiuni suliffeqarfiit innuttaasullu politiinit piumaffigineqarput gassiutitik isumannaatsumut inissittaqqullugit, taamatuttaaq motoorit benziinanik ingerlatillit aamma sianigeqqullugit, Taama Sisimiuni politiit sinnerlugit Johan Davidsen nalunaarpoq.